24 Shkurt 2006

Lëvizja MJAFT, së bashku me shumë personalitete të medias, gazetarë dhe pjesëtarë të tjerë të shoqërisë civile në Shqipëri, organizuan më 24 shkurt një tryezë të rrumbullakët. Aty u shprehën shqetësimet mbi ndryshimet që do të sjellë projekt-ligji për ndryshimin e ligjit "Për Radion dhe Televizionin Publik e Privat në Republikën e Shqipërisë" në funksionimin e KKRT dhe RTSH. Projekt-ligji, i hartuar pa përfshirjen e grupeve të interesit dhe aktorëve në fushën e medias dhe shoqërisë civile, rezultoi se rrezikon të krijojë një KKRT dhe një Këshill Drejtues të RTSH të pabalancuar dhe politikisht të varur.

Për këto arsye, MJAFT së bashku me institucionet mediatike, gazetarë dhe shoqërinë civile në Shqipëri i bëri thirrje Qeverisë, Kuvendit të Shqipërisë dhe Komisioneve Parlamentare që aprovimi i këtij projekt-ligji të pezullohet. Ata kërkuan që ndërkohë të fillojë procesi i konsultimit me grupet e interesit dhe shqyrtimi i alternativave të funksionimit të këtyre institucioneve të rëndësishme për demokracinë në Shqipëri.