19 korrik 2006

Në mjediset e hotel Rogner, më datë 19 korrik 2006, u zhvillua takimi i grupit këshillimor për projektin “Analizë e Shërbimit të Transportit Publik në Rajonin e Tiranës”. Takimi pati një pjesëmarrje të gjerë me përfaqësues nga Ministria e Transportit, përfaqësues të Bashkisë së Tiranës, kryetarë të komunave, drejtues të shoqatave të bashkive dhe komunave, etj. Qëllimi kryesor i takimit ishte të vilte opinionet e grupit këshillimor për objektivat dhe metodologjinë e projektit.

Projekti për transportin publik në rajonin e Tiranës synon kryerjen e kërkimeve në terren për të njohur gjendjen e transportit në këtë rajon, kuadrin ligjor, aktorët institucionalë etj. Kjo njohje do të arrihet në bashkëveprim të ngushtë me grupe të gjera qytetarësh. Rekomandimet që do të dalin nga studimi do të jenë objekt i lobimit që do të bëjë NOSA pranë institucioneve përgjegjëse.

Ky studim është pjesë e projekteve të NOSA-s në kuadër të programit “Shteti ligjor dhe qeverisja e mirë”.